?Met ons jaarlikse reeks #dagindielewe, wat in Mei ter viering van Werkersdag verskyn, vestig ons spesiaal die aandag op ons personeellede by die Universiteit Stellenbosch (US). Vanjaar stel ons jou bekend aan professionele administratiewe steundienstepersoneel wat 'n tasbare verskil in studente se lewens maak.
As 'n tegniese ondersteuningspesialis by IKT Studentedienste, verseker Riyaad Parker dat studente die IT-ondersteuning kry wat hulle nodig het om suksesvol te wees – of dit nou die oplos van hardewareprobleme in rekenaarlaboratoriums is, hulp met toegang tot aanlyn leerhulpmiddels, of om te verseker dat nuwe stelsels agter die skerms uitgerol word.
Wat behels jou rol by die US?
Ek is verantwoordelik vir die gladde werking van stelsels binne IKT Studentedienste. Dit sluit in die ondersteuning van effektiewe kli?ntediens, die verfyning van diensstandaarde, en die handhawing van konsekwente besigheidsprosesse – van die oomblik dat 'n diensversoek inkom totdat dit opgelos is. Ek help ook om te verseker dat hierdie prosesse ontwikkel saam met ons studente se behoeftes en tred hou met die beste bedryfspraktyke.
Hoe lyk 'n tipiese dag by die werk?
Geen twee dae is dieselfde nie, wat deels is hoekom ek dit soveel geniet. 'n Groot gedeelte van my dag behels om spanwerk aan te moedig en leergeleenthede te skep deur mentorskap en indiensopleiding. Ek help nuwe personeel om aan te pas by ons stelsels en prosesse en skakel dikwels met belanghebbendes en sleutelpersoneel.
My verantwoordelikhede strek van die verskaffing van onderhoud en ondersteuning vir rekenaarstelsels en hardeware tot die installering, konfigurasie en opdatering van sowel hardeware as sagteware. Ek help ook om ons lessenaarstelsels (desktop systems) en ondersteuningswebblaaie te bestuur en te verbeter.
Baie van my tyd word bestee aan die oplos van probleme, die skryf van tegniese verslae, die handhawing van bedryfsdienslewerings-ooreenkomste, die uitvoer van sekuriteitskontroles, en om te verseker dat ons IT-diensbestuurprosesse in lyn is met ITIL (Information Technology Infrastructure Library) se standaarde. Ek help ook met die implementering van nuwe toepassings of bedryfstelsels en dra by tot bre?r projekte wat daarop gemik is om IKT Studentedienste aan die voorpunt van die tegnologiese kurwe te hou.
Hoe het jou opleiding of vorige ervarings jou vir dié werk voorberei??
My passie vir IT het vroeg begin. Ek was vyf toe my ma ons eerste rekenaar huis toe gebring het – 'n IBM met 'n MS-DOS-bedryfstelsel. Ek kon myself nie help nie en het uit nuuskierigheid dit uitmekaargehaal!
My akademiese reis het 'n paar draaie geneem – van BSc Rekenaarwetenskap studeer, toe LLB (wat ek nog steeds beplan om te voltooi), tot kwalifisering as 'n Cisco-netwerkspesialis. My praktiese ervaring in die bestuur van seisoenale kleinhandelpersoneel en later die verantwoordelikheid vir 'n hele laerskool se netwerk – wat gegroei het van 40 tot 200 werkende rekenaars met slegs geskenkte toerusting wat ek self herstel het – het 'n stewige grondslag gelê vir wat ek vandag doen.
Wat geniet jy die meeste van jou rol en werk by die US?
Die voortdurende uitdagings hou my aan die gang – elke dag bring iets nuuts om op te los. Ek geniet dit veral om met studente en kollegas te werk in die unieke akademiese en samewerkende atmosfeer van die Universiteit Stellenbosch. Die dorp self, met sy natuurlike skoonheid en energie, dra by tot die aantrekkingskrag.
Vertel ons iets opwindends oor jouself wat min mense sou verwag?
Ek is regtig lief vir motor-detailwerk – ek hou daarvan om voertuie te herstel of te verbeter om hulle so goed soos nuut te laat lyk. Dit is my manier om te ontspan en af te skakel. In my jonger dae het ek motors aangepas en by Killarney resies gejaag, en ek het selfs al hier en daar rekspronge (bungee jumps) gedoen. Ek sou myself so bietjie van 'n avonturier noem – ek hou daarvan om nuwe plekke, kulture en ervarings te ontdek.
