Wat kan Stellenbosch se berge en riviere ons oor KI en beleid leer? Met die uitdaging om kunsmatige intelligensie (KI) en die potensiaal daarvan om beleidmaking te transformeer, te verduidelik, het die Universiteit Stellenbosch (US) se Beleidsinnovasielaboratorium hom na die natuur gewend om die abstrakte herkenbaarder te maak.
“By die Beleidsinnovasielaboratorium aan die Universiteit Stellenbosch se Skool vir Datawetenskap en Rekenaardenke, bestee ons baie tyd daaraan om te dink oor hoe KI beleidmaking op 'n verantwoordelike manier kan transformeer om mense se lewens te verbeter. Maar hoe verduidelik jy dit aan mense op 'n manier wat eg voel?" sê prof. Willem Fourie, hoof van die Beleidsinnovasielaboratorium. Die span het hulle tot die videograaf en ywerige bergklimmer Philip du Plessis gewend om hierdie impak te visualiseer.
“Ons het vir Philip 'n gedugte kreatiewe uitdaging gestel: om Stellenbosch se pragtige natuurlike omgewing – die berge, riviere en inheemse fynbos – te gebruik om te wys hoe konkreet die impak van KI op die wêreld waarin ons leef en op mense se lewens is." Voordat hy met sy kamera veld toe is, het Du Plessis ure se gesprekke met die span opgeneem en hulle perspektiewe gekry oor hoe KI beleidmaking in Suid-Afrika kan verbeter.
Hy het daarna die berge ingevaar om die visuele elemente vas te vang wat daardie perspektiewe lewe moes gee. Dit het gehelp dat Philip 'n avonturier is wat die berge goed ken, skerts Fourie. Meesleurende beeldmateriaal van riviere, berghange en fynbos het die visuele metafore vir KI-stelsels geword: patrone, vloeie en ekosisteme wat aanpas en reageer op hulle omgewing. “Die resultaat is 'n video wat verder as KI-clichés gaan om 'n plaaslike verduideliking te bied van hoe KI beleidmaking kan verbeter – hier in Suid-Afrika, en miskien ook ver buite ons grense," sê Fourie.
?
Meer as die clichés
Die eindproduk vermy die afgesaagde beelde van robotte, datastrome en stroombane wat dikwels met KI geassosieer word. In plaas daarvan bied dit 'n plaaslike en natuur-ge?nspireerde verduideliking wat in Stellenbosch geanker is, maar met bre? relevansie.
Deur die natuur as 'n metafoor te gebruik, maak die video dit makliker om KI nie net as 'n abstrakte algoritme te sien nie, maar as iets wat, soos 'n rivierstelsel of 'n fynbos-ekosisteem, werklike impak en interkonneksies het, sê Fourie. Dit illustreer ook die Beleidsinnovasielaboratorium se multidissiplinêre benadering om verskeie dissiplines – van datawetenskap en -bestuur tot storievertelling en die kunste – te kombineer om maatskaplike uitdagings die hoof te bied.
- Hierdie kennisproduk is moontlik gemaak deur die ondersteuning van die Deutsche Gesellschaft für Internationale Zusammenarbeit (GIZ).
